Sakamálasagan Behind That Curtain eftir bandaríska rithöfundinn Earl Derr Biggers er þriðja sagan af mörgum sem hann skrifaði um rannsóknarlögreglumanninn Charlie Chan, en þær nutu gríðarlegra vinsælda á sínum tíma og voru bæði gerðar kvikmyndir og sjónvarpsþættir eftir þeim. Sagan kom fyrst út árið 1928.

Fyrir 15 árum síðan var lögfræðingur nokkur myrtur í London og eina vísbendingin voru kínverskir inniskór sem hann hafði klæðst rétt fyrir dauða sinn. Allar götur síðan hefur rannsóknarlögreglumaðurinn Frederic Bruce frá Scotland Yard unnið að rannsókn málsins. Að auki hefur hann rannsakað dularfullt hvarf nokkurra kvenna víðsvegar um heiminn. Þegar Bruce sjálfur finnst myrtur - og sást síðast klæddur kínverskum inniskóm sem síðan hafa horfið - er Charlie Chan kallaður til.