Skáldsagan Nostromo: A Tale of the Seaboard eftir Joseph Conrad gerist í námubæ í ímyndaða lýðveldinu Costaguana í Suður-Ameríku. Sagan kom fyrst út árið 1904 og er af mörgum talin með bestu skáldverkum 20. aldarinnar.

Hugmyndina að sögunni má rekja til þess að Conrad, þá unglingur starfandi á skipi á Mexíkóflóa, heyrði sagt frá manni sem einn síns liðs hafði stolið prammafylli af silfri. Um aldarfjórðungi síðar las hann svo ferðasögu þar sem þessi sami silfurþjófur kom fyrir.